പറയാതെ വയ്യ...

നാട്ടിൽ ചില മതേതര, സോഷ്യലിസ്റ്റ് വാദികൾ ഇറങ്ങിയിട്ടുണ്ട്.

മഹാരാഷ്ട്രയിൽ ബീഫ് നിരോധിച്ചു എന്നു പറഞ്ഞാണിപ്പോ അവരുടെ രോദനം. നിരോധിച്ചത് ബീഫ് മൊത്തത്തിലല്ല, ഗോമാംസം മാത്രമാണ് എന്നതൊന്നും അവരുടെ കണ്ണിൽ പെട്ടിട്ടില്ല.

 പത്തൊമ്പത് വർഷം മുൻപ് മഹാരാഷ്ട്രയിലെ ബിജെപി-ശിവസേന ഗവണ്മെന്റ് പാസ്സാക്കിയ ഒരു ബില്ല് രാഷ്ട്രപതി ഒപ്പു വെച്ചതോടെയാണ് നിയമമായത്.

അല്ലാ, രാഷ്ട്രപതി എന്നു പറയുന്ന ആൾ ബിജെപിക്കാരനോ സംഘപരിവാർ അനുഭാവിയോ ഒന്നുമല്ല; ഒരു പഴയ കോൺഗ്രസ്സുകാരനാണ് എന്നതും അവർ കണ്ടമട്ടില്ല.

കേന്ദ്രത്തിൽ യുപിഎ സർക്കാരിനെ പിന്തുണക്കുകയും അതേ സമയം അതേ കേന്ദ്രസർക്കാരിന്റെ നയങ്ങൾക്കെതിരെ സംസ്ഥാനതലത്തിൽ സമരം നടത്തുകയും ചെയ്ത മഹാന്മാരാണ് ഇപ്പോൾ പുതിയ ആക്ഷേപവുമായി രംഗത്തുവന്നിരിക്കുന്നത്.

കേന്ദ്ര ബജറ്റ് കോർപ്പറേറ്റ് പ്രീണനമാണെന്ന് മുറവിളി കൂട്ടുന്ന ഇത്തരക്കാർ കോർപ്പറേറ്റ് ഉത്പന്നങ്ങൾ ഉപേക്ഷിക്കാനും കോർപ്പറേറ്റ് ഉദ്ദ്യോഗം ഉപേക്ഷിക്കാനും തയ്യാറാകുമോ?

കഴിയില്ല... അതിന് ചങ്കുറപ്പ് എന്നൊരു സാധനം വേണം.

ഉടുക്കുന്ന വസ്ത്രവും കുളിക്കുന്ന സോപ്പും പല്ലുതേക്കുന്ന പേസ്റ്റും കാലിലിടുന്ന ചെരിപ്പും കൊണ്ടുനടക്കുന്ന മൊബൈലും ഉപയോഗിക്കുന്ന കമ്പ്യൂട്ടറും കാണുന്ന ടിവിയും എന്നുവേണ്ട തൊട്ട സർവ്വത്ര സാധനങ്ങളും ചെയ്യുന്ന ജോലിയും ബഹുരാഷ്ട്ര കുത്തക കമ്പനികളുടെ... എന്നിട്ട് ഉളുപ്പില്ലാതെ കാലണക്ക് വിലയില്ലാത്ത ആദർശപ്രസംഗവും, സാധാരണക്കാരനു വേണ്ടിയൊഴുക്കുന്ന മുതലക്കണ്ണീരും... പാരമ്പര്യത്തെപ്പോലും വർഗ്ഗീയതയായി കാണുന്ന ഇത്തരക്കാരോട്

'നാണമില്ലേ നിങ്ങൾക്ക്' എന്ന്  ചോദിച്ചിട്ട് കാര്യമില്ല. അതിന് ജനിച്ചപ്പോൾ എരിവും പുളിയും തേച്ചിട്ടുണ്ടാകണം...